周柏豪 呢輪忙住同陳小春、張智霖等參加內地嘅哥哥選秀節目之餘，又一直遊走內地各個城市舉行巡演粉絲見面會，演出門票早喺開售時就引發搶購熱潮。日前杭州站圓滿結束，柏豪同數千名粉絲共度，現場氣氛熱烈。
杭州站係柏豪內地巡演嘅重要一站，演出以「家」為主題，佢為Fans打造一場溫馨又獨特嘅音樂聚會，令每一位歌迷有「回家」嘅感覺。當晚柏豪唔止演唱咗多首經典曲目，好似《夠鐘》同《小白》等都引爆全場大合唱，柏豪亦首唱新歌為歌迷送驚喜。
見面會亦特別設計一系列互動環節，包括「讀出人生篇章里的感謝信」、「雙人對唱KTV」以及「超甜互動KISSCAM」等，柏豪向Fans隔空擺心心冧歌迷，完全拉近同粉絲嘅距離。
柏豪見到台下粉絲嘅熱情支持亦非常感動，佢又感謝大家多年來陪伴，承諾未來會繼續努力創作。佢仲透露結束2025年內地巡演後會稍作休息，希望2026年可以喺香港舉辦演唱會，仲希望有機會喺啓德體育園開騷。